اعلان شهد 1

بقلم: وائل شعبان.
يمكن كل الناس بتنسب المتة للطراطسة، ومابعتقد انو في طرطوسي مابيشرب او شرب متة بحياتو او عالاقل جالس شريبة المتة باحد القعدات، سواء الطويلة منها او القصيرة، الصبح وبالسهرة او العصرونية، عالبرندة او جنب الصوبيا.

الشي يلي بدي ياه من القراء الأعزاء يضيفوه مشكورين هوي رأين بالمتة كمشروب وتقليد وعادة وطريقة وطقس أو حتى كظاهرة اجتماعية.

وبحب بلش بحالي:

فأنا بشرب المتة بالعادة مرتين يومياً بحكم انو وقتي شوي منظم، وبالاجازة ما بشيلا بالخالص من قدامي،

وصارت عندي طقس بالغربة مترافق مع شرود من نوع خاص بسترجع فيه أجمل اللحظات يلي مرت بحياتي أثناء مشاركة الاحباب شرب المتة.

الا انو العجيب بالامر بانو من اصل اربع ساعات بقضين بالبيت بعد دوامي يوميا (غير النوم) عم خصص للمتة منن ساعتين واذا ما شربت ما بشعر بانو لنهاري معنى.

هل هاد الشي ادمان يا ترى؟ والله ما بعرف الا انو مافيني اتخيل هالحياة بلاها.

وبالمناسبة: هي بعض المصطلحات المنقولة يلي بتأكد التداخل الكبير بين المتة وأكتر مفاصل حياتنا:

ما اطيب من كاسة المتة هون؟: يعني المنطقة جميلة جدا.

حزور وين شربت متة؟: تدل على غرابة مكان زرته.

حزور مع مين شربت متة؟: قعدت مع واحد ما رح تتوقعو أبدا.

ياما شربان معو متة: كنت صاحبو لهداك الشب (و بتنقال لما الشب التاني بتعلا مراكزو).

سخنو: / سخنا: أنا جاييك عالطريق، او : مسافة الطريق وبكون صرت عندك.

نقاع: يعني تخلى عن رزانتك و شاركنا أطراف الحديث.

لسا ما قطعت كاستك: بتنقال اذا ضيفك بدو يروح و ما طول بالقعدة.

بدنا نجدد: قعدتنا مطولة.

جددنا تلت مرات: يعني الزلمة طول عندي.

قطعت كاستو و ما كنت جددلو: دبقني الأخ و حاولت قحطلو.

ما كنت سخن الأبريق: تعمل عمل سابقتها.

مركّزا لحالي: يعني حاطط كاسة متة و قاعد لحالي قعدة رواق.

حزور شو نسينا؟: يعني ما جبنا الأبريق (لما منكون بسيران).

طيبة هلق كاسة المتة: بتنقال بعد أي شي بيعملو الطرطوسي و بالأخص بعد أكلة دسمة, أو لما تشتي الدني.

بدا كاسة متة: الشغلة بدا تركيز.

ما بيشرب متة: مقت.

قاعد و حاطط كاسة متة قدامو: طايلة قعدتو (بتنقال اذا ناطر حدا).

قاعد مأشرب متة: مو ماعمل شي (اذا انسألت شو متعمل).

ما شربتنا متة: ما كانت ضيافتك منيحة (بتنقال عسيبيل المزحة).

ما شربنا متة: ما كانت ضيافتو منيحة (بتنقال بجدية).

شبك؟! بدنا نشرب متة: لا تقلي رايح.

يلا بشرب كاستين: ما رح خجلك, بس عنجد أنا مستعجل.

منشرب متة بالأول ولا مناكل و منشرب متة؟: تنظيم وقت السيران.

انقالت بقعدة متة: ضعيفة المصداقية.

وأخيراً.

ما صرلي دوق المتة اليوم: دليل على الانشغال الكامل.

**************
مـجـد سـوريـة
MAJD SYRIA

**************
مواضيع متعلقة:

المتّة بريئة من جميع التهم المنسوبة إليها

مهلاً ربى

لا تمسحي الكحل

إلى من يوّد الإغتراب يوماً

تعليقات الفيسبوك

تعليقات الموقع

  1. أبو شمعون
    رد

    أحلا كاسة متة لعيونك هي عزيمة اهلا و سهلا
    سلمت يداك موضوع مسلي و المتة بشكل عام بصراحة برأي مفيد اجتماعيا كظاهرة اكتر من صحيا كمشروب بل هوي بشوفوا مقرف احيانا انا بشرب متة اذا اجتمع عندي رفاقي غير هيك بمية سنة ما بفكر اشربها بالقليلة خففت من اتجاه الناس نحو المشروبات الروحية لولاها برايي شبابنا كان شريب بنسبة أكبر من الحالية

  2. Muna yousef
    رد

    والله ما بعبي راسي غير كاس مشروب روحي
    يعني لا تقلي متة ولا شاي ولا قهوة

  3. اسعد خشروف
    رد

    المتى و بس…حتى انها كانت واضحة في ام الطنافس و راينا ابطال ضيعة ضايعة يشربون المتى بسعادة.
    انا اشتري المتى باليورو و ثمن الربع 2 يورو تقريبا ..

  4. منى
    رد

    المتة وما أدراك ما المتة
    انا شربتا مرة وحدة بحياتي وئتا مرت خالو عملتلي بحس أنو هي منيحة بالبرد وبعد شي وجبة دسمة
    احلى شي المصاصة تبعتها

  5. moussa
    رد

    المتة بالمجتمع الطرطوسي ليست شراب بقدر ما هو ادمان بس والله طيبة شو بدنا

اترك رد